אינהאלסרייכע טיפס פאר עסקנים

ס’איז היינט אן אפענע וועלט ווי כל דורש ומבקש קען אנקומען צו אומצאליגע אינפארמאציע, און פארשטייט זיך אז אין עולם העסקנות פרובירט מען צו ניצן אסאך בחנם’דיגע אינפארמאציע, ווי איידער צו באצאלן דערפאר, פשוט ווייל מ’איז געדרוקט מיט געלט

למעשה אבער, אומזיסטע אינפארמאציע אדער סערוויסעס מוז נישט זיין דאס בעסטע פארן ארגאניזאציע, ווייל פראפעסיאנאלע מענטשן וואס לייגן אריין טייערע צייט צאמצושטעלן די ריכטיגע און אויסגעהאלטענע אינפארמאציע, וועלן געווענטליך פרובירן צוריק צו מאכן זייער געלט אויף עפעס אן אופן, במילא וועלן זיי ערגעץ רעכענען געלט פאר זייער ארבעט. אבער די וואס האבן סתם צאמגעשלעפט אומזיסטע דאטא מכל הבא ליד, ערהאלטן שוואכערע אינפארמאציע וואס מוז נישט זיין ריכטיג…

בנוסף צום פאריגע וואכעדיגע טיפ ‘הושענא נפש מבהלה’ איז כדי צו וויסן:

ווען ס’קומט צו רעדוצירן סיי וועלכע הוצאות [און בפרט ממון הקדש] קען מען איינשפארן זייער אסאך געלט, ווען מ’טוט זאכן דוקא ווען ס’איז ‘נישט’ דער סעזאן, און ווי מער מ’איז אויסגערעכנט פון פאראויס, אלס מער קען דאס צוניץ קומען.

עס מאכט זיך אסאך מאל ביי עסקנים ווען מ’האלט בעפאר א דעד-ליין, און מ’שלאגט זיך מיטן זייגער צו פארענדיגן גאנץ וויכטיגע אקטיוויטעטן, קען אמאל פאסירן אז ס’גייט נישט וויאזוי מ’וויל… ווער רעדט נאך אויב ס’רוקט זיך אונטער אן אומגעראכטענע פאנטשער.

איז אזוי, אויב האט מען גענוג ערפארונג צו באהאנדלען א שווערע נושא, און מ’קען אנגיין אין סיי וועלכע מצב, הרי טוב…

עס ווערט געברענגט אין די ספרים הק’ (פון אריה”ק, קב הישר, ושא”ס) אז ‘אראפשרייבן’ וואס מ’לערנט איז מסוגל צו געדענקען, נו ווער לערנט נאך אזויפיל ווי א פארנומענער עסקן? וואס ‘לערנט’ דאס מענטשהייט 24/7 ביי זיינע באשעפטיגונגען…

זיך “פארשרייבן” אפילו קורצע פונקטן פון יעדע ‘טעסק’ איז פון די בעסטע אופנים צו האלטן קאפ, און צו קענען איבערגיין די פריאריטעטן / פלענער, ווי אויך בלייבט עס שטערקער איינגעקריצט אין מוח, ווי מ’קען גרינגערהייט מאנעוורירן פון איין טעסק צום צווייטן.

היינטיגע צייטן קען מען זיך באניצן מיט נאך אן עצה: צו האבן ביי די האנט א ‘רעקארדער’ אדער סעלפאון, אז ווי נאר ס’בליצט אויף א גוטע געדאנק, זאל מען דאס תיכף קענען אריינזאגן,

ווען אן עסקן באגעגנט סיי וועלכע ערפינדונג אין עולם המסחר, איז ראטזאם אויפצופאסן אויב מ’קען מעגליך ניצן די זעלבע ערפינדונג אויך אין עולם העסקנות, און אויב יא, דאס קודם מיטטיילן מיט די ארגאניזאציע מיט וועמען ער ארבעט מיט.

כדי אנצוקומען און מצליח זיין אין סיי וועלכן הינזיכט, דארף מען דאס טון מיט די מאקסימום שלימות, און פיל מער דארף זיין אזוי אין עולם העסקנות, און ווען מ’פרובירט צו טון זאכן גרינטליך, וועט מען זיכער בעסער מצליח זיין.

נאכמער, אויב מ’טוט זאכן אויבערפלעכליך קען מען שפעטער פארלירן אסאך צייט, פונקט ווי א בנין וואס מ’האט נישט געהעריג פלאנירט – וועט מען דארפן שנעלער איבערבויען, און פונקט ווי א קינד וואס מ’האט פארנאכלעסיגט יונגערהייט – וועט מען דארפן שפעטער צוגעבן פריוואטע הילף.

עס איז נישט קיין סוד אז כלל ישראל קען אייביג ניצן נאך און נאך עסקנים, און וויפיל ס’קומט צו איז קיינמאל נישט צופיל, דעריבער איז ראטזאם ווען מ’באגעגנט א טויגליכער אינגערמאן אדער בעה”ב, וואס פארשטייט אן עסק און לייגט אמאל צו א פלייצע, זאל מען אים געבן דעם אפעטיט און אים צוביסלעך אריינברענגען אינעם עולם העסקנות.

עס זענען פארהאן אסאך געלונגענע עסקנים וואס זענען נישט אזוי באשעפטיגט מיט עסקנות אינעם טאג-טעגליכן סדר היום, אבער מאידך גיסא ווען מ’דארף זיי האבן, שטעלן זיי זיך צי מיטן פולסטן אייפער און קומען שטארק צוניץ פאר כלל ישראל, (א שטייגער ווי אין א זומער קעמפ, נסיעות, ימים טובים, יומא דפגרא אדער יארצייט).

ס’איז פארשטענדליך אז איידער מ’שפרינגט אריין אין א פראיעקט בעולם המסחר, דארף מען גוט שוקל זיין פינאנציעל די הוצאות און הכנסות, זיכער צו מאכן אויב די קומענדיגע שריט וואס מ’נעמט איז טאקע אויסגעהאלטן, ווייל דער גאנצער יסוד אין ביזנעס איז דאך ‘לשם ביזנעס’.